مہاراشٹر : کورونا مریضوں کیلئے شاہنواز شیخ نے اٹھایا انوکھا قدم ، ہر طرف ہورہی جم کر تعریف ، جانئے کیوں

ممبئی : کووڈ کے بڑھتے ہوئے معاملات نے میڈیکل سسٹم کو ہلا کر رکھ دیا ہے ۔ اسپتالوں میں بیڈ دستیاب نہیں ہیں ۔ آکسیجن کی کمی واضح طور پر دکھائی دے رہی ہے ۔ ایسے افرا تفری کے معاملج میں اگر کسی مریض کو مفت میں سلنڈر مل جاتا ہے اور وہ بھی ضرورت کے مطابق تو پھر اس کی زندگی میں اس سے بہتر اور کیا چیزہوسکتی ہے ۔ (تصویر اور رپورٹ : وسیم انصاری)

ممبئی کے شاہنواز شیخ اب آکسیجن انسان بن گئے ہیں ۔ لوگ انہیں آکسیجن انسان کے نام سے جانتے ہیں ۔ اس کی وجہ یہ ہے کہ گزشتہ سال جب کورونا کی وبا ممبئی میں تباہی مچا رہی تھی ۔ اسپتالوں کا برا حال تھا ۔ اسی دوران ان کے ایک دوست کی بہن آکسیجن کے بغیر آٹو رکشا میں انتقال کر گئی تھی ۔ اگر اسے بروقت آکسیجن مل جاتا تو اس کی جان بچ سکتی تھی ۔

اس واقعہ نے شاہنواز کے اندر گہرا اثر کیا اور اس کے اندر کورونا مریضوں کی زندگی بچانے کا حوصلہ پیدا کردیا ۔ مریضوں کی مدد کر نے کیلئے شاہنواز نے اپنی فورڈ اینڈیور ایس یو وی کار تک بیچ دی اور 60 آکسیجن سلنڈر خریدے اور 40 کرائے پر لئے ۔

آج ان کے پاس 200 آکسیجن سلنڈر ہیں ۔ شاہنواز نے اگلے سال کورونا قہرمیں تقریبا 4000 کووڈ مریضوں کو بروقت سلنڈر فراہم کرکے ان کی جان بچائی ہے ۔ کورونا کی دوسری لہر نے ممبئی میں قہر برپا کردیا ہے ۔ ایسے حالات میں شاہنواز ایک بار پھر لوگوں کی مدد کے لئے آگے آئے ہیں ۔

کورونا میں مبتلا لوگوں تک زیادہ سے زیادہ مدد پہنچ سکے ، اس کے لئے شاہنواز نے ملاڈ میں وار روم قائم کیا ہے ۔ روزانہ انہیں 500 فون کالس آرہے ہیں اور وہ سب کی مدد کر رہے ہیں ۔ اگر ممبئی میں کسی کو ضرورت ہے ، تو وہ شاہنواز کو 98920-12132 پر فون کرسکتے ہیں ۔

ساتھ ہی مفت آکسیجن سلنڈر کے ساتھ بیڈ ، آئی سی یو ، وینٹی لیٹر اس طرح کی تمام معلومات ان کے وار روم سے لوگوں تک پہنچائی جارہی ہیں ۔